Arbeiðið komið væl áleiðis
Arbeiðið at leingja flogbreytina gongur væl og er komið væl áleiðis, hóast kavi hevur tarnað arbeiðsgongdini nakað í vetur.
Nú arbeitt er í góðar tíggju mánaðar, umleið miðskeiðis í arbeiðstíðarskeiðinum, er nógv virksemi í gongd samstundis á arbeiðsøkinum.
Uppfyllingin eystanfyri er nærum komin upp í hædd, higartil einar 750.000 rúmmetrar. Eftir er at fylla upp eitt øki, millum verandi breyt og leingingina eystureftir.
Arbeiðið at leggja leiðingar er byrjað, fyrstu metrarnir eru lagdir á norðursíðuni, framvið nýggju flogvallarbreytini eystanfyri.
Kavi hevur ligið nakrar dagar báðumegin nýggjársleitið og tarnað arbeiðnum nakað.
Gongd er komið á arbeiðið aftur og uppfyllingin vestanfyri gongur væl, einar 200.000 rúmmetrar av gróti eru innbygdir.
Gongd er komin á grevstur fyri og planering av grøv, til leiðingar framvið verandi flogvallarbreyt. Byrjað er á norðursíðuni og arbeitt verður mest um náttina.
Vága Floghavn hevur lagt grót á goymslu, ætlað til framtíðar terminal projekt.
Grótgoymslan liggur á einum øki, millum hangarin hjá danska hervaldinum og frakthøllina hjá Vága Floghavn.
Bjargingar- og tænastuvegir eru partvíst gjørdir og verandi atkomuvegur til portrið á norðursíðuni, er breiðkaður og javnaður.
Arbeiðsvegur er gjørdur á útvinningsøkinum soleiðis, at koyrast kann frá útvinningsøkinum til báðar flogvallarendarnar.
Fleiri myndir kunnu síggjast her á síðuni undir – Útbygging flogbreyt / Myndasavn 2011 og 2010.