Vit mæla til at fara í góðari tíð gjøgnum trygdareftirlitið, so tú kanst taka tær av løttum í fráfaringarhøllini.

Í fráfaringarhøllina er stórt DutyFree øki, har til ber at handla undan fráferð. Eisini finnur tú her Kafé Duty Free, har tú kanst keypa tær okkurt leskiligt at eta og drekka. 

Fráfaringarhøllin hevur eisini góðar stólar, sofur og arbeiðsborð við kontaktum, so tú kanst løða telduna ella fartelefonina, um tú hevur tørv á tí.

Í Vága Floghavn eru tríggjar út- og inngongdir til flogførini, sonevndar "Gates”, nummereraðar ávíkavist nr. 1, 2 og 3. 

Nógvar seinkingar stava frá, at ferðandi koma í evstu løtu. Hetta kann føra við sær, at flogfarið ikki sleppur avstað til ásettu tíð, sum kann føra til enn fleiri seinkingar. So minst til at møta í góðari tíð – tað ger ferðina hjá bæði tær og øðrum lættari.