Stuðul

Stuðulskipan í samband við menning av flogleiðum

Um stuðulsskipanina

Í fíggjarætlanini hjá Vága Floghavn er fyri 2017 ein játtan á 2MDKK, sum er ætla til - saman við vinnuni - at marknaðarføra flogleiðir til og frá Føroyum.

 

Endamálið við stuðulsskipanini er:

  • saman við vinnuni at fremja marknaðarføring av flogleiðum til og frá Føroyum og brúkast til at marknaðarføra Føroyum sum ferðamáli.
  • at stuðla framtøkum uttanlands, har beinleiðis og óbeinleiðis flogleiðir verða sýnd ella har nýggir marknaðir og segmentir skulu troytast.
  • at stuðla tiltøkum, sum kunnu menna flogleiðir og økja um áhugan fyri Føroyum, sum ferðamáli.
  • at stuðla tiltøkum, sum kunnu menna Føroyar sum vinnuferðamál
  • at stuðul sum útgangspunkt ikki verður veittur til vanligu marknaðarrøktina hjá eini fyritøku, so sum vanligar kundavitjanir og til luttøku á messum, gerð av heimasíðum, faldarum o.l.
  • at stuðla ferðamálum og flogleiðum, sum Visit Faroe Islands hevur meldað út eru lyklamarknaðir. Hesir marknaðir eru fyrst og fremst norðurlond, Týskland, Bretland, Holland og Frakland. Eisini er USA mett til at vera ein marknaður sum hevur vakstrarmøguleikar.

 

Marknaðarátøkini verða samskipa við marknaðarætlanirnar hjá Visit Faroe Islands.

 

Í hesum sambandi hevur Vága Floghavn gjørt niðanfyristandandi leiðreglur fyri:

  • hvat stuðul kann søkjast til
  • hvør kann søkja um stuðul og
  • undir hvørjum treytum stuðul verður veittur. 

Umsókn skal sendast Vága Floghavn saman við fylgiskjølum, ið lýsa verkætlanina.

Vanliga skulu í minsta lagi hesar upplýsingar vera til skjals:

  • endamál (stutt lýsing)
  • gjøllig lýsing av verkætlanini, sum skal sendast saman við umsóknarblaðnum
  • upplýsingar um umsøkjara
  • upplýsingar um samstarvspartar
  • upplýsingar um verkætlanleiðara
  • tíðarætlan
  • nágreinilig kostnaðarætlan
  • fíggingarætlan

 

Umsóknin skal sendast til fae@fae.fo

 

Umsøkjarar kunnu venda sær til Vága Floghavn á +298 354400 um nærri leiðbeining.

Vága Floghavn hevur ein trímannabólk sum viðger umsóknir, og sendir tær, um neyðugt, til Visit Faroe Islands, til ummælis.   

 

Umsóknarfreistir

Umsókn skal sendast Vága Floghavn innan ásettu freistina, sum er 20. august 2017. Umsøkjarar kunnu søkja innan freistina, og kunnu vænta sær svar innan 21 dagar frá tí at umsóknin er móttikin.

 

Hvør kann søkja um stuðul ?

Stuðul verður bert játtaður flogfeløgnum sum arbeiða við at menna leiðir til og frá Føroyum, og sum vilja styrkja støðu sína á útlendska marknaðinum og vilja verða við í arbeiðinum at marknaðarføra Føroyar sum ferðamál.

Við ”flogfelag” skal í hesum sambandi skiljast juridisk eind – ið virka á handilsligum grundarlagi, og sum m.a. arbeiða við at menna ella marknaðarføra flogleiðir til og frá Føroyum við Føroyar sum ferðamál.

Samstarv millum fyritøkur

Um fyritøkur samstarva um eina ávísa verkætlan, skal hetta vera upplýst í umsóknini. Fyritøkan, sum skal vera flogfelagið sum flýgur ella hevur ætlanir um at flúgva, ið hevur leiðsluna av samstarvinum, skal søkja um stuðulin, og tað er hon, ið fær stuðulin útgoldnan.

Um fyriskipan av verkætlanum v.m.

Umsøkjari skal leggja fram nágreiniligar ætlanir, sum fevna um allar týðandi liðir í verkætlanini, so sum fíggjar-, tíðar- og aktivitetsætlan o.a.

Vága Floghavn kann krevja, at umsøkjari vísir á, at flogfelagi hevur neyðugu orkuna til at gjøgnumføra verkætlanina, og at hon í hesum sambandi hevur fíggjarliga orku og starvsfólk við neyðugum førleika soleiðis, at lagdar ætlanir verða hildnar. Vága Floghavn kann seta sum treyt:

 

  • at verkætlanin verður sundurbýtt,
  • at ávíst fyrireikandi arbeiði, t.d. marknaðarkanning, verður gjørt, áðrenn høvuðsverkætlanin verður sett í verk, og
  • at framhald av aðrari verkætlan er treytað av nøktandi úrsliti av fyrru verkætlanini.

 

Stuðul verður ikki játtaður til innanhýsis konsulent- og/ella lønarútreiðslur hjá umsøkjara.

 

Hámørk og lágmørk fyri stuðli:

  • Í stuðulsskipanini er ásettur mest møguligi stuðul, sum Vága Floghavn kann játta. Í mesta lagi kann játtast 700.000 kr., til einstaka fyritøku. Vága Floghavn kann síggja burtur frá hámarkinum, tá talan er um stórar felags verkætlanir.
  • Umsókn uppá stuðul undir 50.000 kr. verða, sum útgangsstøði, ikki gingin á møti.  

 

Játtanir og upplýsingarskylda:

  • Játtanir eru grundaðar á, at upplýsingar, sum eru fingnar frá umsøkjarum í umsóknini ella á annan hátt undir málsviðgerðini, eru rættar. Um ikki, kann væntast at Vága Floghavn krevur endurgjald frá umsøkjara sum hevur fingið stuðul frá felagnum.
  • Stuðulin er treytaður av, at umsøkjarin fylgir egnum ætlanum fyri verkætlanina. Um týðandi broytingar verða gjørdar, skal umsókn beinanvegin sendast Vága Floghavn við umbøn um at góðtaka broytingina.
  • Umsøkjari skal upplýsa, um annar almennur stuðul er veittur ella verður søktur í sambandi við verkætlanina og til hvørjar partar av verkætlanini.
  • Um verkætlanin ikki er liðug 1. novembur 2017, skal stuðulsmóttakarin senda Vága Floghavn eina ávegisfrágreiðing, sum lýsir støðuna og gongdina í verkætlanini.

 

Útgjalding av stuðli:

  • Stuðulin verður útgoldin í einum, tá Vága Floghavn hevur fingið verkætlanarroknskap og skrivliga frágreiðing og eftirmeting av tiltakinum. Í sambandi við stórar tíðarkrevjandi verkætlanir, kann avtala gerast um ávegis útgjøld.
  • Vága Floghavn kann gera av um verkætlanarroknskapur, skal latast felagnum, saman við tilhoyrandi skjalprógvum fyri útreiðslurnar.
  • Verkætlanarroknskapir skulu vera uppsettir soleiðis, at møguligt er at samanbera við kostnaðarætlanina í umsóknini.
  • Upplýsast skal, um útreiðslur eru tiknar við, sum ikki vóru í kostnaðarætlanini.
  • Um fortreytirnar fyri eini játtan broytast munandi, og Vága Floghavn ikki hevur fingið fráboðan um hetta og hevur góðtikið tær, kann Vága Floghavn taka avgerð um ikki at útgjalda játtaðan stuðul, uttan so at talan er um viðurskifti, sum umsøkjarin onga ávirkan hevur á.
  • Er stuðul útgoldin undir skeivum fortreytum, ella um fortreytir fyri útgoldnum stuðli broytast, kann Vága Floghavn krevja, at stuðulin verður afturgoldin.