Arbeiðið at leingja flogbreytina gongur væl og longu nú eru munandi nøgdir av gróti sprongdar, fluttar og innbygdar.

Nú góðar fýra mánaðar eftir arbeiðsbyrjan, sæst uppfyllingin væl í lendinum.
Arbeitt verður í skiftivaktum, frá mánamorgun kl. 08.00 til leygarmorgun kl. 08.00.
Fleiri amboð eru komin á arbeiðsplássið síðstu tíðina, dagliga verða eini 8.000 m3 av gróti fluttir og higartil eru tilsamans 250.000 m3 av gróti fluttir.

Arbeitt verður fyri tað mesta við endan á flogbreytini sum er ímóti Vatninum.
Fyribils trygdarhegn er sett upp sunnan- og eystanfyri flogbreytina, bjargingarvegur er gjørdur og verandi vegur yvir til grótbrotið er breiðkaður og javnaður.
Nógv mold er grivin av á suður-/eystursíðuni, sprongd verða stór skot dagliga og stórsti parturin av grótinum er innbygt í komandi flogbreytarenda.
Arbeiði uppá pierin er byrjað, og veitir og rennur eru gjørdar, ið savna saman vatnið, ið rennur frá arbeiðsøkinum.

Fleiri myndir kunnu síggjast her á síðuni undir - Um Vága Floghavn / Útbygging / Flogbreytin / Myndasavn 2010.